Финляндия Европанын АКШ менен Кытай технологияларына болгон көз карандылыгы жакын арада жоголбой турганын билдирди.
1
Politico билдиргендей, Финляндиянын Коопсуздук жана чалгын кызматынын башчысы Юха Мартелиус Европа америкалык программалык камсыздоодон жана кытайлык жабдуулардан толук баш тарта албай турганын айтты. Анын айтымында, технологиялык көз карандылык өтө терең деңгээлге жеткен.
Финляндиялык аткаминер чет элдик булут платформаларын колдонуу Европа өлкөлөрүнүн санариптик эгемендүүлүгүнө коркунуч жаратарын белгиледи. ЕБде учурда стратегиялык маалыматтарды иштетүүдө америкалык сервистерди колдонууга чектөө киргизүү маселеси талкууланып жатат, жазат InoZpress.
Фин чалгын кызматы кандай коркунуч тууралуу айтты
Юха Мартелиус Таллин шаарындагы коопсуздук конференциясында Европа бир эле учурда АКШ менен Кытайдын технологияларына көз каранды болуп калганын билдирди.
Бул тууралуу айтып жатып, ал төмөнкүдөй пикирин айтты:
«Корком, биз эки түрдүү ракка чалдыккан организмдей болуп калдык. Балким, аны операция кылуу мүмкүн эмес, бирок муну менен жашаса болот».
Анын айтымында, Европа өлкөлөрү улуттук коопсуздукка тиешелүү тармактарда дагы чет өлкөлүк технологияларды колдонууну улантып жатышат.
ЕБ эмне үчүн чет элдик сервистерден кооптонууда
Финляндиянын коопсуздук кызматынын баяндамасында мамлекеттик маалыматтарды чет элдик булут сервистеринде сактоо өзүнчө тобокелдик катары көрсөтүлгөн.
Юха Мартелиус Финляндия шайлоого байланышкан маалыматтарды тышкы платформаларда сактабаганын мисал келтирди.
Ал бул тууралуу төмөнкүлөрдү белгиледи:
«Улуттук коопсуздукту камсыз кылуу үчүн чечүүчү мааниге ээ болгон маалыматтар, мисалы шайлоого байланышкан маалыматтар — булар менен эч бир чет элдик компания алектенбеши керек».
Батыш ЖМКларынын маалыматына ылайык, Еврокомиссия жакын арада технологиялык эгемендүүлүк боюнча жаңы демилгелерди сунушташы мүмкүн.
Европа технология жана инвестиция тартыштыгына туш болду
Юха Мартелиус Европа азырынча америкалык ири булут провайдерлерине атаандаш боло турган өз платформаларын түзө албай турганын айтты.
Анын пикиринде, Финляндия кванттык технологиялар жана космостук изилдөөлөр тармагында күчтүү мүмкүнчүлүктөргө ээ, бирок ЕБ өлкөлөрүндө бул багыттарды өнүктүрүү үчүн инвестиция жетишсиз.
Ошондой эле Батыш басылмалары Европада Орусия тараптан болушу мүмкүн болгон коркунучтар тууралуу тынчсыздануулар күчөгөнүн жазышууда. Айрым өлкөлөр өздөрүнүн абадан коргонуу мүмкүнчүлүктөрү алсырап калат деп кооптонуп, Украинага кошумча Patriot ракеталарын берүүгө шашылбай жатышат.
Эске салсак, буга чейин Виктор Орбандын үгүт материалдары жана майдаланган документтер тууралуу жазганбыз.
